तरकारी र फलफुलमा अनिवार्यरुपमा विषादीको परिक्षण गर्नुपर्ने माग गर्दै सर्वोच्च अदालतमा स्वतन्त्र राष्ट्रिय अभियानका तर्फबाट अधिवक्ता स्वागत नेपाल र नारायणप्रसाद दुवाडीले रीट दर्ता गरेका छन्।
उनीहरुले स्वतन्त्र राष्ट्रिय अभियानका तर्फबाट माग गर्दै भारतबाट आयात भएको तरकारी र फलफुलमात्र नभई नेपालमै उत्पादन हुने तरकारी र फलफूल पनि अनिवार्यरुपमा परीक्षण गराएर मात्रै उपभोक्तामाझ विक्री वितरण गर्नुपर्ने जनाएका छन्।
स्वास्थ्य खान पाउने नागरिकको नैसर्गिक अधिकार भएकोले चेकजाँच गर्ने आवश्यक पूर्वाधार नभएको बहानामा रोकिनु गलत भएको उल्लेख निवेदकहरुले रिटमा प्रष्ट्याएका छन्। सरकारले गत असार २ गते निकासी पैठारीसम्बन्धी आदेश राजपत्रमा प्रकाशित गरी तरकारी तथा फलफूलको सीमा नाकामा विषादी परीक्षण गर्नुपर्ने उल्लेख गर्दै चेकजाँचलाई अघि बढाएको थियो ।जसको भारतीय दूतावासले पत्र लेखेरै विरोध गर्यो ।
लगतै सरकारले तयारी नपुगेको र चेकजाँच गर्ने आवश्यक पूर्वाधार नभएको भन्दै ६ महिनालाई विषादी जाँच गर्ने निर्णय स्थगित गर्यो । जसको अहिले सर्वत्र विरोध भइरहेको छ ।
